台式飲品鋪早早進駐了香港，走在街上隨手可買來杯珍珠奶茶邊行邊飲，但其實速飲文化不單只可套用在這些飲品身上，用來推廣特色雞尾酒同樣成事。
同是90後的Tracy、Jeffrey、阿銘及Samson在兩年前創立Y Cocktail & Mocktail，由原先只是推著水吧車穿梭各個市集擺檔，到最近投資六十多萬在K11開下地鋪，正式落地。
「我哋覺得飲cocktail及mocktail唔一定要喺酒吧，唔會有個等號喺中間。」當初最先萌起木頭車賣cocktail及mocktail的人是Jeffrey，現時仍在修讀碩士學位的他結果找來同是Y世代、當時還在念書的Tracy、阿銘、Samson及另外兩名朋友一同開創此品牌，後來有兩名創辦人因想專注學業而先後退出，現時由前者四名成員共同走下去。
過去兩年，Y Cocktail & Mocktail成功以三代不同款式的水吧車走訪各個市集賺盡人氣，也曾經獲邀到電車派對及公司活動中提供雞尾酒到會服務，真正做到「去到邊飲到邊」。
「有好多朋友問過我，將Y Cocktail & Mocktail成為地鋪，喺咪失去左當初車仔嘅理念?其實唔喺，因我哋當初希望做到嘅都喺開鋪，以速飲take away嘅模式去推廣，呢加只喺走返我哋嘅原點。」而另一個令他們選擇開鋪的原因，正正是看到市集的影響力漸漸到頂，是時間找個落腳點讓客人在活動過後，得以尋回他們的飲品。
負責行政、宣傳和對外事務的Tracy說:「開鋪就一定怕蝕，但我哋係開鋪前已經評估過我哋可以承受嘅能力。」
目前Y Cocktail & Mocktail落地於尖沙咀K11商場專屬樓層Natural，該層原先為近萬呎酒樓舖位，後來改為分拆出租給本地不同品牌，其拒絕透露租金，但指是受到K11邀請進駐。負責財務計劃的Samson指以現今階段來說，預計三至六個月就可達致收支平衡。
「Y Cocktail & Mocktail，其實取其名就喺我哋所有創辦人都喺嚟至Y世代，以及取其諧音，就喺可以代表wide，又或是音wine，酒嘅意思，提供唔同款式嘅酒款比客人。」目前店內設14款不同的cocktail及mocktail，定價由三十三元至四十六元不等。
為了迎接寒冷天氣，店內更設三款熱飲，其中一款名為「Cozy Marshmallow」，定價四十二元。「呢杯採用左綠薄荷甜酒、牛奶、白朱古力以及香草味糖漿所沖製而成，上面重會放棉花糖，散發啖啖香味。」
酒味不濃又帶有棉花糖之甜味，岩晒一眾文青女生用以暖身。而店內另一款名為「Tsar Alexander II」之飲品同樣能突破一般人對雞尾酒的看法，「呢杯由咖啡甜酒、黑色嘅vodka再加牛奶沖製而成，喺參考我咃兩款經典cocktail結合而成。」
帶濃濃咖啡香氣之雞尾酒易入口得來又比普通咖啡及奶茶來得新鮮。除了固定款式外，店內也會因應時節加推相應飲品以便客人「呃like」。
為了更貼合人性化，客人更可「量力而為」地選擇一至五度的酒精度數，更可用五十至六十元選擇「神秘」服務。「有個類似度身訂做嘅服務帶比客人，可以因著佢需要同心情而去調製一杯屬於佢嘅酒。」
於Y Cocktail & Mocktail中負責產品研發的阿銘有三至四年的調酒經驗，指可按當日與客人聊天的內容，即場調配屬於他們當天心情的飲品，保證獨一無二。同時也歡迎大家在特別日子如週年紀念或朋友生日時預早跟他們聯絡，配合提供驚喜。